सरकारले सार्वजनिक यातायात, लामो दूरीका यातायात, हवाई उडान तथा खेलकुद प्रशिक्षण आउँदो भदौ १५ गतेसम्म बन्द गर्ने निर्णय



सोमबार बेलुका प्रधानमन्त्री निवास बालुवाटारमा बसेको मन्त्रिपरिषद् बैठकले नेपालमा कोरोना भाइरसको सङ्क्रमण बढिरहेको निष्कर्ष निकाल्दै यस्तो निर्णय गरेको हो ।

यसअघि सरकारले भदौ १ गतेदेखि लामो दुरीका यातायात सञ्चालन गर्न दिने अनुमति दिएको थियो । सीमा नाका भने भदौ मसान्तसम्म बन्द गर्ने बैठकले निर्णय गरेको छ ।
सरकारले काठमाडौँ उपत्यकामा कोरोना सङ्क्रमणको जोखिम उच्च भएसँगै सार्वजनिक यातायात सञ्चालनमा भदौ १५ गतेसम्म पुनः रोक लगाउने निर्णय गरेको छ ।

काठमाडौँ उपत्यकाका नगरपालिकाहरूका मेयरहरूको सङ्गठन ‘नगरपालिका मेयर फोरमले गरेको आग्रहमा सरकारले यस्तो निर्णय गरेको हो ।

त्यस्तै भदौ १ गतेदेखि सञ्चालनको तयारीमा रहेको अन्तर्राष्ट्रिय र आन्तरिक उडान पनि रोक लगाउने निर्णय भएको सरकारका प्रवक्ता अर्थ तथा सञ्चारमन्त्री युवराज खतिवडाले बताउनु भएको छ ।

कलकारखाना, उद्योग, निर्बाध रुपमा सञ्चालन भई मजदुरहरूको दैनिक आवतजावत बढेकाले सङ्क्रमणको जोखिम पनि बढेको हुनाले उद्योग तथा कलकारखानाभित्र क्वारेन्टाइनको व्यवस्था गर्ने र स्वास्थ्य मापदण्ड पूरा गरेपछि मात्रै सञ्चालन गर्न दिने निर्णय पनि मन्त्रिपरिषद् बैठकले गरेको छ ।

बैठकले सीमा नाकामा पनि अवैध आवतजावत जारी रहेको भन्दै थप कडाइ गर्ने निर्णय गरेको छ । साथै, उपत्यका प्रवेश गर्ने नाकामा पनि कडाइ गर्ने निर्णय गरेको छ ।
त्यसै गरि सरकारले भदौ १५ गतेसम्मका लागि कुनै पनि खेल गतिविधी र प्रशिक्षण गतिविधी गर्न नपाउने निर्णय गरेको छ ।

यो आकस्मिक निर्णयपछि भदौ एक गतेबाट अखिल नेपाल फुटबल संघ एन्फाले फिफा विश्वकप छनोटको तयारी अन्योलमा पर्ने भएको छ । एन्फाले भदौ एकगतेबाट प्रशिक्षण सुरु गर्ने तयारीका साथ सोमबारबाट खेलाडी र कर्मचारीको कोरोना परिक्षण सुरु गरिसकेको छ ।
काठमाडौंमा कोरोना र त्यसबाट मृत्यु हुनेको संख्या बढ्दै गएकाले सरकारले नै यसअघिको निर्णयलाई परिवर्तन गर्दै १५ दिनका लागि लम्ब्याउने निर्णय गरेको हो ।

नेपालमा पछिल्लो पटक कोरोना संक्रमण दिनकै तीन चार सयको हारहारीमा बढिरहेको छ । काठमाडौं उपत्यकामा मात्र ११ सय भन्दा बढि संक्रमित भइसकेका छन ।

यता नेपाल क्रिकेट संघ क्यानले भने यसअघि नै भदौमा हुने भनिएको प्रशिक्षण तत्काल नहुने बताइसकेको छ । यो बर्ष नेपाली क्रिकेट टिमको कुनै पनि प्रतियोगिता नभएको भन्दै प्रशिक्षणपनि अहिले नगर्ने बताएको छ ।

यस्तै टोकियो ओलम्पिकको तयारीमा रहेको करातेको प्रशिक्षणपनि अब रोकिने संभावना रहेको छ ।

प्रकाशित मिति : २०७७ साउन २६ गते सोमवार
प्रतिक्रिया दिनुहोस्